Добивај вести на Viber
Трговскиот дефицит на Јапонија лани достигна рекордни 112 милијарди долари, што е највисоко ниво од 1979 година или откако се применува постоечкиот модел за пресметка на дефицитот, соопшти Министерството за финансии во Токио.
Во декември 2013-та дефицитот се зголемил двојно, во однос на истиот месец во 2012-та.
Причина за зголемувањето на трговскиот минус се должи пред се на зголемената потрошувачка на енергенси од увоз по катастрофата во нуклеарната централа Фукушима, што ги намалува придобивките од евтиниот јен на извозно ориентираната економија.
Извозот од Јапонија минатата година е зголемен за 9,5 отсто на 69,79 милијарди јени, што е прв раст во последните три години. Но во истовреме се бележи значително поголем раст на увозот од 15 отсто на рекордни 81,26 милијарди јени.
Увозот на фосилните горива во оваа земја порасна за да се надополни недостатокот во производството на струја по затворањето на нуклеарните реактори на Фукушима, кои пред катастрофата произведуваа една третина од електричната енергија во Јапонија.