Гацов: Неуките пензионери тешко ќе се снајдат со новите правила на УЈП
Објавено во: Економија 13 Септември, 2018
Новите правила и процедури со кои се штитат податоците за граѓаните не земаат предвид дека даночни обврзници се и пензионери, потоа дигитално неуки, како луѓе кои се болни дури и слепи, за кои овој бирократски чин на регистрација ќе биде посебно тежок, вели за Фактор Павле Гацов, претседател на Здружението на даночни советници на РМ.
Тој посочува дека ангажирањето на полномошник создава друг вид на обврски за кои треба и да се плати коментирајќи го фактот дека и пензионерите пред комјутер ќе треба да се регистрираат во новиот систем на УЈП.
!Составувањето на првата е-Годишна даночна пријава е ново модерно решение на Управата за јавни приходи, подготвувано подолго време. Самото составување на пријавата го генерира софтвер на УЈП, а полнењето на базите на податоци се врши аконтативно во текот на цела 2018-та година од страна на исплатувачите – правни субјекти, но и од страна на самите граѓани, кога остваруваат приходи од странство, од други граѓани, од капитални добивки од продажба на наедвижен имот, ... сето тоа преку интернет платформата e-pdd.ujp.gov.mk. Подготвената е-Годишна даночна пријава, УЈП има обврска по електронски пат да ја достави до секој даночен обврзник-граѓанин на проверка и потврдување. Токму овој механизам на проверка и потврдување, бара од даночните обврзници што остварувале приходи да се регистрираат во електрнскиот систем на УЈП со свое електронско санддаче“, објаснува Гацов.
Тој сепак потенцира дека заради олеснување на обврзниците, Управата треба да создаде услови нејзините службеници, користејќи ги веќе активните мобилните даночни шалтери да ги посетуваат овие граѓани за да ги регистрираат на „нивен терен“ а како што додава во игра може да биде и регистрација на обврзниците-граѓани кај банките, односно кај нотарите, во присуство на службено лице, претставник на УЈП.