Добивај вести на Viber
Најдоцна до 15 октомври Владата на Хрватска ќе распише тендер за продажба на „Croatia Airlines“, а според зацртаниот распоред, новиот сопственик или косопственик на националната авиокомпанија би можел да биде познат во февруари идната година. Можни се два модели, докапитализација или класична продажба на акциите.
Како што пишува „Утрински лист“, засега интерес покажале авиокомпаниите „Garuda Indonesia“ и кинеската компанија „China Southern Airlines“. Како потенцијален трет купувач се споменува „Etihad“ од ОАЕ, кој неодамна купи 49 проценти од „JAT“.
Според груби проценки, за 100 проценти од акциите, компанијата би можела да добие околу 300 милиони куни. Според правилата на Европската комисија, фирмите надвор од Европската унија можат да купат најмногу 49 проценти од целата компанија.
За што подобро да ги запознаат со ситуацијата во „Croatia Airlines“, министерот за транспорт Синиша Хајдаш Дончиќ, претседателот на Надзорниот одбор на „Croatia Airlines“ Синиша Петровиќ и неговиот заменик Дарко Пребежац, следната недела во Џакарта ќе се сретнат со челниците на „Garuda“, претседателот на индонезиската економска комора и тамошниот министер за транспорт.
Соговорниците на „Утрински Лист“ тврдат дека разговорите со претставниците на „Garuda“ траат веќе неколку месеци и дека влегле во многу сериозна фаза. Министерот Хајдаш Дончиќ пред неколку месеци најави продажба на дел од „Croatia Airlines“.