Генерали инвестментс: Интересен е пазарот на Југоисточна Европа, дивидендите се примамливи

Добивај вести на Viber

Портфолио менаџерите во Генерали Инвестментс составија резиме за тековните случувања кои влијаат врз пазарот на капитал и актуелни совети за инвеститорите.

Преглед на моменталните случувања:

Податоците за инфлацијата и одговорите на централната банка на САД – ФЕД беа во фокусот на инвеститорите на светските пазари во текот на изминатата недела. Порастот на цената на потрошувачката кошница на годишна основа во декември изнесува седум отсто. Толку висока инфлација во САД не е забележана во последниве четириесет години. На движењето на каматните стапки бурно реагираа и најчувствителните акции од ИТ секторот. Индексот на најголемите технолошки компании Nasdaq на кратко влезе во областа на техничка корекција (пад од 10% од локалниот врв). Очекуваниот принос на американските 10-годишни државни обврзници остана нешто под 1,8 проценти, што покажува дека бројките за инфлација и сослушувањето на гувернерот на ФЕД Џером Пауел во Сенатот, поминаа повеќе или помалку во согласност со очекувањата на пазарот. Последните денови започна сезоната на објавување на квартални резултати, при што некои банки беа првите големи играчи во САД кои ги претставија своите деловни постигнувања во последниот квартал од минатата година. И покрај тоа што бројките ги надминаа проценките на аналитичарите, цените на акциите на финансискиот сектор реагираа негативно на најавите, особено на лидерот во индустријата JPMorgan Chase. Инвеститорите се загрижени поради зголемените трошоци за работна сила и падот на нето добивката во споредба со претходните квартали. Во наредните денови, сезоната на објавување на резултати ќе земе замав, што ќе го зацрта правецот на движењата на пазарот во блиска иднина. Овојпат, заедно со другите клучни ставки, особено под лупа ќе биде успехот на компаниите во справувањето со инфлаторните притисоци.

Европската берза во текот на изминатата недела беше под големо влијание на случувањата од другата страна на Атлантикот. Повеќето главни индекси го губеа теренот наспроти заострената монетарна политика во САД. Неодамнешните податоци од Германија покажуваат раст на БДП од 2,7% во 2021 година. За разлика од повеќето други големи економии, најголемата европска економија останува под нивото пред епидемијата. Закрепнувањето е попречено главно од недостатокот на полупроводници во автомобилската индустрија и опстојувањето на прилично строги рестриктивни мерки. Растот би бил уште помал без производителот на вакцини BioNTech, кој придонесе со дури 0,5 проценти во годишниот раст на бруто домашниот производ на земјата. Економскиот раст на стариот континент продолжува да се забавува поради цените на енергијата, кои и понатаму се многу високи. Аналитичарите проценуваат дека енергетската криза во ЕУ може да доведе до пад на БДП и до еден процент. Влијанието ќе биде особено силно во помалку развиените земји-членки, каде што домаќинствата трошат релативно поголем дел од својот расположлив приход на енергија. Непријатностите сè уште ги предизвикува Ковид-19. Поради големиот број луѓе во карантин и изолација, недостаток на кадар во здравството и образованието, авиокомпаниите ги откажуваат летовите, нарушен е јавниот превоз, а на некои места се празнат полиците во маркетите. Бројот на дневно потврдени случаи со Ковид во многу делови од светот достигнува рекордни бројки, но процентот на позитивни на кои им е потребен болнички третман е многу помал отколку во претходните бранови. Според експертите, епидемијата полека завршува со сегашниот бран, но сеуште економијата и општеството се соочуваат со неколку напорни недели на справување со недостиг на кадар во важни области за непречено функционирање на општеството.

И на кинеската берза во последните денови доминира црвената боја. За разлика од Западот, тие се соочуваат со забавување на економскиот раст, а не со зголемена инфлација. Нултата политика на Ковид-19 и растечката економска несигурност во услови на криза во секторот на недвижности ја ослабуваат потрошувачката. Кинеската централна банка веќе реагираше со намалување на основната каматна стапка. Во поглед на односите меѓу Русија и Западот и покрај низата средби на високи претставници од двете страни, нема напредок во односите. Русија останува непоколеблива, особено во нејзините барања да се запре ширењето на НАТО во земјите од поранешниот Советски Сојуз. Изминатиот викенд, тензиите дополнително ескалираа со сајбер напад врз веб-страниците на украинската влада. Се засили одливот на странски капитал од двата засегнати пазари.

Светла точка на изминатата недела е пазарот во Словенија. Индексот SBITOP го продолжува нагорниот тренд. Растот беше поттикнат од акциите на Телеком и Лука Копер, а изгледите за Љубљанската берза во 2022 година остануваат оптимистички.

На пазарот на суровини, цената на нафтата продолжи да расте со падот на американскиот долар. За барел од 159 литри потребни се околу 85 долари. Заострените односи меѓу Русија и Украина и понатаму ја задржуваат високата цена на природниот гас. И двете земји се значајни извозници на житни култури, а евентуалната ескалација во вооружен конфликт меѓу двете земји веројатно уште повеќе би ги зголемила цените на земјоделските суровини.

Совети за инвеститорите:

2022 година ќе продолжи да биде многу непредвидлива година, а стратегијата ќе треба неколку пати да се прилагодува на променливите околности. Силното влијание на пандемијата врз пазарите ќе продолжи, а фактот дека останува со нас станува се поочигледен. Но, главниот фокус сепак ќе биде ставен на централните банки и нивните интервенции на пазарот на пари. Зголемувањето на каматните стапки во САД изгледа неизбежно, всушност, каматните стапки веќе вклучија четири зголемувања од 0,25%, главно поради драстично зголемената инфлација. ЕЦБ има поголем проблем тука, бидејќи не планира кочење на ликвидноста, но во исто време и цените на енергијата вртоглаво растат. Како резултат на тоа, приносите на банките остануваат негативни, а обврзниците продолжуваат да нудат речиси никаков принос. Затоа, глобално диверзифицираните инвестиции во акции остануваат најатрактивниот избор. Акцентот во рамките на ова е ставен на развиените пазари, а европските акции доаѓаат до израз во последните денови, бидејќи американските акции се под притисок поради корекција во ИТ секторот.

Сепак, за долгорочните инвеститори, технолошките акции остануваат префериран избор, бидејќи нудат раст на бизнисот и стремеж кон нови трендови. Индустријата, исто така, останува атрактивен избор. Сите зелени и одржливи политики почнуваат и завршуваат со индустријата. Потрошувачот ќе следи ако индустријата води. Затоа, аналитичарите сметаат дека одредени сегменти од индустријата се многу привлечни. Последниве денови во прв план беа акциите на финансиските друштва, особено банките и осигурителните компании. Најавените зголемувања на каматните стапки се пресвртницата што може да ја врати финансиската индустрија на мапата, после 10 години постојано заостанување зад другите индустрии. Слично е и со енергетиката, каде што има голема трансформација во насока на зелено, но во исто време, како и финансиите, нуди високи дивиденди и зајакнување на откуп на сопствените акции. Здравството останува интересно, бидејќи пандемијата и бенигните реформи во здравствената заштита во САД не ги загрозуваат маргините од една страна, а од друга страна, вреднувањата се поволни за повеќето големи компании. Секторот за снабдување е карта на пазарот за поскапување на струјата и гасот, но земјите се сè порешени да ја ублажат состојбата на потрошувачите преку нивните интервенции, па оваа неизвесност ги оддалечува инвеститорите и создава шпекулативни можности во индустријата. Основните производи за широка потрошувачка привремено се во неволја поради зголемената инфлација, бидејќи маржите се намалуваат, но инвеститорите веќе подолго време ја занемаруваат оваа индустрија, па можеби ќе има можност за заработка, особено во втората половина од годината. Кинеските акции, а со тоа и акциите на пазарите во развој, остануваат како похрабар чекор, вреднувањата се привлечни, но крајот на регулаторната трансформација на кинеската економија не е на повидок. Загрижувачко е и продолжувањето на нултата ковид политика, која силно влијае врз негативниот економскиот раст, кој земјата се обидува да го оживее со намалување на каматните стапки. Интересен останува локалниoт пазар во Југоисточна Европа, каде вреднувањата се поволни, а дивидендите се многу примамливи. На крајот, да не заборавиме, диверзификацијата е мајка на мудроста. Главниот дел од портфолиото треба да биде глобално дисперзиран, а потоа додаваме поединечни средства во приказната каде што гледаме можност. И пред сè, да ја одржиме дисциплината и да продолжиме со програмирани уплати, бидејќи историјата нè учи дека ова е убедливо најдобриот пристап за максимизирање на заштедите.