Генералниот владин секретар денеска на состанок со странските инвеститори
Објавено во: Економија 27 Мај, 2020
Мила Царовска, вицепремиерот за економски прашања, денеска одговарајќи на новинарско прашање рече дека владиниот генерален секретар Драги Рашковски денеска одржува состанок со странските инвеститори на кој треба да се разгледа нивното барање за финансиска помош во кризниот период.
Големите извозни компании бараат Владата да обезбеди директна финансиска поддршка и да им додели неповратна помош односно грантови. Асоцијацијата на странски компании со технолошки напредно производство веќе испрати писмо до Владата и надлежните ресори. Освен паричната помош, бараат и мораториум за обврските кои ги имаат кон државата, но и усогласување на царинските стапки. Тие ги поддржуваат владините мерки за помош на погодени компании, но тврдат дека се потребни и други.
- Денеска има состанок на генералниот секретар со Советот на странските инвеститори, се со цел да се разгледаат не само можностите за продолжување на постоечките мерки, туку повеќе да размислуваме развојно кое што ние можеме да го понудиме за да привлечеме повеќе од нив и да им дадеме можност да се развиваат нови операции во нашата држава, рече Царовска пред медиумите.
Уредбите за третиот сет економски мерки веќе се поминати на владина седница, рече Царовска, а во текот на неделата треба да бидат објавувани од надлежните министерства.