Германија и Франција ќе ја повлечат еврозоната напред
Објавено во: Економија 21 Февруари, 2017
Растот на бизнис активноста во еврозоната се забрзува во февруари до највисокото ниво од речиси шест години, станува јасно од последната анкета за секторите на производство и услуги на IHS Markit.
Резултатите покажуваат стабилен раст за француската и германската економија и покрај политичката неизвесност и во двете земји поради претстојните претседателски и парламентарни избори, пренесува CNBC.
Вкупниот индекс се искачи до 56 поени во февруари од 54,4 поени во јануари. Тоа е највисока вредност од април 2011 година. Индексот ги надмина очекувањата на анкетираните аналитичари од Ројтерс за раст до 54,3 поени.
Знаците за побрз раст може да обезбедат цврста основа за економија на 19-те земји членки на еврозоната, додека таа влегува во година на потенцијално бурна политика. Европската централна банка (ЕЦБ) одлучи во декември да ја продолжи програмата за откуп на обврзници до крајот на 2017 година, со оглед на слабата основна инфлација и несигурноста од националните избори и од почетокот на преговорите за условите за излегување на Велика Британија од Европската унија .