Го обвинуваат Вучиќ дека го ветил Косово на Американците
Објавено во: Балкан 17 Април, 2018
Поранешнот српски министер за надворешни работи и актуелен лидер на опозициската Народна партија (НС), Вук Јеремиќ, вели дека српскиот претседател, Александар Вучиќ „им го ветил Косово на Американците“, но дека има проблем како да го исполни тоа ветување.
На трибината во Нови Сад, како што јави дописникот на МИА, Јеремиќ изјави дека на Вучиќ единствено не му одговара барањето на Американците да му дозволи на Косово место во ОН.
„Американците бараат од Вучиќ да го внесе Косово во ОН и да го потпише т.н. договор за сеопфатна нормализација на односите со Приштина, а го притискаат и да побара од Русија да не го блокира сето тоа во Советот за безбедност на ОН“ – изјави Јеремиќ.
Смета дека Вучиќ се обидел да понуди размена на територии, но таквата понуда била одбиена затоа што наводно веќе ветил да го внесе Косово во ОН.
„Нам не ни се противници во косовското прашање Албанците, туку оние кои ја создаваа таа држава и кои ни ја одземаат таа територија“ - изјави денеска Вучиќ.
Во интервју за Пинк телевизија, тој рече дека е „јасно оти за Косово се преговара со САД, Велика Британија и уште неколку држави од Европската унија“.
Вучиќ додаде дека Приштина, како што изјави косовскиот премиер Рамуш Харадинај, нема своја надворешна политика бидејќи за нив ја води САД.
Во интервјуто Вучиќ наведе дека Србија води самостојна надворешна поитика, седи „на свое столче“, но и дека се лажат оние кои мислат дека е можно да се развива што било на европскиот континент без поддршка од Германија.
Тој вели дека оваа година ќе биде тешка за Србија.