Градоначалникот на Гази Баба од Инфективна: Се надевам дека секој од нас тука брзо ќе ја добие битката

Добивај вести на Viber

Борис Георгиевски, градоначалникот на Гази Баба, на својот профил на Фејсбук од Клиниката за инфективни болести, каде што е хоспитализиран откако неговиот тест на Ковид-19 се покажа како позитивен, посака сите пациент што се со него заедно што е можно побргу да оздрават.

„Искрена благодарност за грижата до сите кои се јавувате и ми пишувате мене или на моето семејство. Со огромна посветеност и пожртвуваност на докторите и сите медицински лица се надевам дека секој од нас тука многу брзо ќе ја добие битката со коронавирусот.

За жал, ги читам и малициозните информации и лаги кои некои портали ги објавуваат. Ве замолувам да не им се лутите и да не им земате за зло.

Да останеме сплотени бидејќи само на тој начин ќе успееме како општество да ја добиеме битката со ова зло наречено коронавирус. Јас и понатаму ќе ги следам препораките на лекарите и ќе постапувам согласно нивните насоки“, објави Георгиевски.

Тој додаде дека општината која што ја раководи ќе продолжи да функционира без измени во управувањето.

„Општина Гази Баба и целиот тим продолжува тековно да функционира бидејќи потребите на моите сограѓани остануваат секогаш приоритет и за мене и за Општината. Ви благодарам уште еднаш и се гледаме наскоро!“, напиша градоначалникот.