Граѓани му се пожaлија на Жерновски дека не сакаат барок на нивните фасади

Добивај вести на Viber

Градоначалникот на Центар Андреј Жерновски денеска прими кај себе група граѓани кои не се согласуваат со промена на фасадите на нивните згради во барок-стил. Овие граѓани кои не сакале нова фасада, се пожалија дека неодамна добиле „заканувачки писма од Градот Скопје“ дека имаат 10 дена да се премислат, затоа што нивниот објект е дел од Програмата за реконструкција на фасади во централното градско подрачје. Еден од жителите кои живеат на улица Македонија, Владимир Вангелов вели дека она што тие го бараат е енергетски ефикасна фасада. „Промената само на предната страна на фасадата нам ништо не ни значи. Овде се работи за приватна сопственост и сами проценете дали ова писмо што го добивме од Коце Трајановски е писмо од еден градоначалник. Ова за нас е суптилен политички притисок. Три пати прегласувавме во Центар, дали треба и сега три пати да го искажеме нашиот став? Заморени сме од барокот, дајте ни можност сами да си одлучиме како ќе изгледа нашата зграда“, ијави по средбата Вангелов. Жерновски им ветил дека тој и општината се отворени за сите иницијативи на граѓаните и дека се подготвени да влезат со реконструкцијата на фасадите според проектот кој што го реализира општината, а се однесува на енергетски ефикасни фасади. „Ако влеземе како општина, се разбира – доколку тоа го сакаат граѓаните, нема да има барок. Моја максима е – барокот далеку од општина Центар. Доколку ние го реализираме ова, тоа ќе биде како и во сите други згради кои добија енергетски ефикасни фасади, а тоа е реконструкција од сите четири страни, а не како што нуди Град Скопје – само на предниот дел. И тука ќе го задржиме автентичниот изглед на зградата, а мотив повеќе за ова е фактот дека овој дел до пред извесно време бил споменична целина“, вели Жерновскки.