Познато со кои соработници на Трамп ќе се сретне Мицкоски во Вашингтон, со дел од нив веќе имал средби

Добивај вести на Viber

Премиерот Христијан Мицкоски посетата на САД од 18-ти јануари по покана за присуство на инаугурацијата на Доналд Трамп ќе ја искористи за средби со идни соработници од администрацијата на новиот американски претседател.

Повикувајќи се на владини извори, како што објави ДВ,очекувањата се дека за време на престојот Мицкоски ќе се сретне со Хауард Лутник, копретседавач на тимот за транзиција на Трамп и иден министер за трговија, потоа Девин Нунес, номиниран за претседавач со советодавното тело за разузнавање на претседателот Доналд Трамп и извршен директор на „Trump Media & Technology Group", извршниот директор на Рамбл (Rumble), Крис Павловски, Линда Мекмахон, предложена за министерка за образование, Каш Пател предложен за директор на ФБИ, идниот амбасадор на САД во НАТО, Мет Витакер, Себастијан Горка, предложен за асистент на претседателот Трамп и виш директор за контратероризам.

„За време на посетата ќе се афирмираат македонските позиции и интереси во поглед на надворешната политика и европската интеграција на земјата, како и соработката со САД на повеќе значајни полиња. Ова е прва ваква можност во историјата на самостојна Македонија, премиерот на Владата на вака високо ниво во американската политика да оствари контакти значајни за државата“, велат владини извори.

Мицкоски веќе се има сретнато претходно со Лутник и Нунес, кога се уште беше неизвесно дали Трамп ќе победи на претседателските избори.