Граѓаните се повеќе се интересираат за своите права како потрошувачи

Добивај вести на Viber

Над 150 потрошувачи во првите шест месеци од годинава, пријавиле неправилности поврзани со декларацијата на производите, информира денеска Организацијата на потрошувачи на Македонија. Потрошувачите реагирале дека производот е со поинакви својства од оние кои треба да ги има, а дел од нив, оти одреден производ не е со наведениот квалитет во декларацијата. На денешната промотивна кампања „Ние потрошувачите имаме право да знаеме“, претседателката на Организацијата на потрошувачите Марија Велкова-Лончар рече дека по секоја организирана кампања имаат поголем број јавувања од потрошувачите кои бараат совети како да постапат во одредени случаи кога се незадоволни или имаат потреба да реагираат за производите и услугите. Министерот за економија, Ваљон Сарачини, информира дека надзорен орган каде потрошувачите можат да побараат заштита на своите права е Државниот пазарен инспекторат. - Сакам да ставам акцент посебно на транспарентното и јасно претставување на правата на потрошувачите кои произлегуваат од Законот за заштита на потрошувачи, а имаат за цел да го заштитат потрошувачот од нефер односи и непрофесионално работење на некои субјекти, од една страна, и да овозможат елиминирање на нелојалната конкуренција меѓу трговците, професионално извршување на дејноста и фер односи на пазарот од друга, рече Сарачини. На денешната кампања беше истакнато дека при купувањето на производите потрошувачите треба посебно внимание да посветат на декларацијата, гаранцијата и другите технички податоци за производот, а при склучувањето на договорите да посветат внимание на условите дадени во нив. Кампањата беше организирана од Министерството за економија, Организацијата на потрошувачите во соработка со Сити Мол.