Грчкото МНР ќе испрати демарш до Турција

Добивај вести на Viber

Грчкото Mинистерство за надворешни работи ќе испрати демарш до Анкара откако хеликоптерот со кој се превезувал премиерот Алексис Ципрас бил пресретнат од турски воени авиони.

Два турски Ф-4 авиони без претходно да достават план за летање, влегле во грчкиот воздушен простор и на само неколку милји му се приближиле на воениот хеликоптер во кој бил Ципрас, пишуваат грчките медиуми. Грчкиот пилот морал да ја намали висината на летање додека на помош не му пристигнале неколку авиони на грчката армија.

За инцидентот реагираа од грчката опозициска партија Нова демократија од каде побараа владата веднаш да реагира и да го осуди инцидентот. Надлежниот за надворешна политика во партијата, Јоргос Кумуцакос изјави дека не е првпат турските провокации да се изразуваат врз претставници на власта, но исто така не е ниту првпат Анкара да провоцира во деновите кога Грција ја слави нејзината историја и религија.

Турската армија ги демантираше тврдењата дека нивни авиони премногу блиску се доближиле до хеликоптерот со кој летал грчкиот премиер и порачаа дека тие само ги вршеле стандардните, рутински, мисии во реонот. Ципрас кусо по инцидентот и порача на турската Влада дека непотребно се обидува да предизвика инцидент и дека ако е треба и со пливање ќе стигне до најоддалеченото место во државата.