Грција: Отштета од 15 илјади евра поради навреда дека не е патриот за македонското прашање

Добивај вести на Viber

Поради тоа што го навредил дека не е патриот за македонското прашање, судот одлучил поранешниот солунски префект Панајотис Псомијадис да плати 15.000 евра на поранешниот европарламентарец од грчката партија на зелените, Михалис Тремопулос, пишува Дневник. Тужбата е стара две години, поради настанот кога Псомијадис пред две години во телевизиски емисии го нападна Тремопулос дека бил единствениот грчки европратеник што дал зелено светло за извештајот за Македонија. Во тоа време, солунскиот префект, кој беше на суд поради злоупотреба на службената положба, кажа дека некој сака да го замолчи поради неговите ставови за Македонија. Тогаш Псомијадис побара наместо со него, јавноста да се занимава со антигрчките изјави на грчките пратеници, споменувајќи ја посетата на Тремопулос во Скопје, на заедничка дебата со партијата ДОМ за градење нуклеарни централи во регионот. Ваквите изјави на Псомијадис го налутија европратеникот од редовите на зелените и го натераа да поднесе тужба. „Бев во Скопје за соработка со тамошната партија на екологистите против изградба на нуклеарна централа на само 12 км од грчката граница. Наместо да ни се честита за оваа иницијатива, Псомијадис и неговите поддржувачи сакаат да не вмешаат во оваа приказна за пропаганда и антигрчки позиции“,  изјави пред две години Тремопулос. Тремопулос не е единствениот грчки политичар што беше обвинет дека нема доволно тврди ставови во однос на прашањето за името. Пред пет години тогашниот советник за политички комуникации, Григорис Валијанатос, беше избркан од ПАСОK бидејќи во телевизиска емисија кажа дека соседната земја треба да се нарекува Македонија и дека постои македонско малцинство во Грција. Иако кажа дека ваквите ставови се негово лично мислење, не му помогна. Грчката опозициска партија СИРИЗАго отстрани својот претставник Насос Теодоридис од Парламентарната комисија за човекови права откако на социјалните мрежи промовирал промакедонски и протурски ставови, пишува весникот.