Грешка на пликоата: Поништена постапката за субвенции на авиокомпании
Објавено во: Економија 06 Август, 2018
На трите запечатени внатершни пликоа не бил наведен полниот назив и адреса на авиопревозникот. Министерството за транспорт и врски поради ова ја поништи постапката за доделување финансиска поддршка на авиопревозници. Оттаму соопштуваат дека на јавното отворање што се одржи на 27. јули годинава била доставена само една понуда.
„На јавното отворање, Комисијата констатирала дека доставеното барање за доделување финансиска поддршка не е доставено согласно точка 2.1 од Документацијата за барање, односно на трите запечатени внатрешни пликоа не е наведен полниот назив и адреса на авиопревозникот, што е еден од условите пропишани во Документацијата за барање. Врз основа на ова, Комисијата констатирала дека не постојат услови за понатамошна евалуација на пристигнатото барање за финансиска поддршка, соопштуваат од Министерството.
Затоа постапката била поништена. Од Министерството велат дека во најкраток рок јавниот повик за доделување финансиска поддршка на авиопревозници, повторно ќе биде објавен.