Грција го започна процесот на раселување на имигрантите по квотите на ЕУ

Добивај вести на Viber

Грција го започна процесот на раселување на имигрантите по квотите на ЕУ во другите европски земји, изјави денеска грчкиот премиер Алексис Ципрас, цитиран од агенциите.

Првата група од 30 бегалци од Сирија и Ирак одлета денес за Луксембург, додал Ципрас на аеродромот во Атина.

„Разбирам дека денес тоа е капка во морето, но ќе се обидеме да ја претвориме оваа капка во голем проток на организирано раселување на бегалците од земјите во кои тие се прифатени привремено“, посочил грчкиот премиер.

Потсетуваме дека вчера претседателот на Европскиот совет Доналд Туск најави дека закажува нова вонредна седница на државите и владите од Европската унија (ЕУ) за миграција за 12 ноември. Главната цел на вонредната средба ќе биде да се даде оценка на спроведувањето на усвоените мерки за справување со кризата. Предвидено е известувањето за напредокот на преговорите со Турција за миграциските прашања и евалуација на активностите за спроведување на квотите за раселување.

„Сигурен сум дека условите таму ќе бидат прекрасни и денес ние со министерот за надворешни работи на Луксембург, Жан Аселборн, претседателот на Европскиот парламент Мартин Шулц и еврокомесарот за внатрешни работи Димитрис Аврамопулос им рековме на аеродромот во Атина „збогум“ на оние луѓе кои заминуваат на патувањето од нивните соништа.

„Денес за прв пат видов насмевки на лицата на децата кои бегаат од војната. Ќе вложиме максимални напори овие насмевки да бидат се повеќе“, изјавил Ципрас.

„Ќе им помагаме на луѓето. Ова е Европа, во која живееме. Ова не е Европа на ѕидовите со жица, додал тој.

Денес од Атина за Луксембург заминуваат шест семејства од Сирија и Ирак. Тие се првите мигранти, кои ќе бидат раселени по двегодишниот план на ЕУ во вредност од 780 милиони евра, забележуваат агенциите.