Груевски: Нема да сугерирам кого да одберат за претседател на ВМРО-ДПМНЕ
Објавено во: Македонија 11 Декември, 2017
Никола Груевски кој си поднесе оставка од лидерската позиција на Фејсбук напиша дека новиот претседател на ВМРО-ДПМНЕ треба да го изберат членовите на партијата и во него треба да имаат длабока верба.
Наведува дека нема да се меша во изборот на неговиот наследник и дека во оваа
битка нема да фаворизира никого.
„Повеќето од оние личности чии имиња секојдневно се спомeнуваат во медиумите се мои долгогодишни соработници и пријатели. Сме делеле и добро и лошо, и со сите нив имам блиски релации, како службени, така и приватни. Затоа, јас не планирам да се мешам во одлуките на делегатите, ниту да им сугерирам кого да поддржат и одберат за претседател на ВМРО- ДПМНЕ. Не планирам „да застанам зад еден“, да фаворизирам еден, а на сметка на другите кандидати користејќи го моето влијание како долгогодишен претседател на ВМРО- ДПМНЕ“- напиша Груевски на Фејсбук.
Груевски пишува дека секој од можните кандидати има доволно знаење, визија и капацитет
да го победи СДСМ .Тој им сугерира да водат фер натпревар без навреди за
противкандидатите, затоа што вели изборот ќе заврши за дванаесет дена и потоа секој е потребен на партијата.
Конгрес на кој ќе се избере лидер ќе се одржи во Валандово на 22 и 23 декември.