ГРУЕВСКИ ЗА ПРИТВОРОТ НА СОПАРТИЈЦИТЕ: Ова е преседан, oва е режим
Објавено во: Македонија 06 Декември, 2017
Лидерот на ВМРО-ДПМНЕ, Никола Груевски, по одложувањето на рочиштето за случајот „Траекторија“ изјави дека со одредувањето притвор за шесте пратеници се случило „директно уривање на демократијата“.
Тој упати апел до обвинителството, до судот и особено до СДСМ кој, како што рече, ставил сè под своја контрола, да го не прави тоа затоа што претставува уривање на демократијата.
„Ова е преседан. Ова е режим. Ова е директно уривање на демократијата. Партијата што пред шест месеци не го вадеше зборот „режим“ од уста, сега директно спроведува режим и ја урива демократијата. Ова го немало ниту во 1949 година. По 16 часа да се држат луѓе со лисици на рацете и да им се одредува притвор за ништо“ – рече Груевски.
Прашан дали ќе биде кандидат за претседател на ВМРО-ДПМНЕ на престојаниот вонреден конгрес на партијата, Груевски отпрвин не сакаше да коментира, но подзастана и за медиумите рече дека целата постапка околу вонредниот конгрес што треба да се одржи на 23 декември, како и досега, ќе биде транспарентна и јавноста за сè ќе биде навреме известена.