ХИРУРЗИТЕ ВО ГОБ „8 СЕПТЕМВРИ“ СЕГА ОПЕРИРААТ ВО ТРИ САЛИ: Ангажиран е уште еден анестезиолог

Добивај вести на Viber

Наместо во две, сега хирузите од ГОБ „8 Септември“ по нивното предупредување преку отворено писмо дека нема да ги оперираат неитните пациенти, оперативните зафати ги изведуваат во три оперативни сали. Раководството на болницата за Фактор потврди дека поради помал број на анестезиолози кои се ангажирани околу лекувањето и третманот на болните од ковид, ангажиран е анестезиолог од Чаир.

Оттаму посочуваат дека ГОБ „8 Септември“ од март минатата година со Одлука на Владата е претворена во најголем Ковид Центар во Македонија која година и половина во континуитет хоспитализира, лечи и негува огромен број пациенти од целата држава.

-Во вакви вонредни околности, невозможно е да се очекува дека установата и сите нејзини оддели ќе функционираат на редовен начин, исто како што работеле пред претворање на ГОБ „8 Септември“ во Ковид центар. Напротив, сите наши напори се насочени првенствено кон помагање и лекување на животнозагрозените пациенти болни од смртоносниот вирус, ставајќи ги на располагање не само техничките и просторните, туку и кадровските капацитети на установата. Тоа подразбира, дека установата во целост, но и хирургија располага со помал број на анестезиолози и хирурзи, најпрво заради потребата тие да земат активно учество во Ковид центарот заедно со сите други колеги доктори, а второ, заради зголемениот број на отсуства кои се резултат на заболувања и кај медицинските лица. Постигнат е договор со посредство на Министерство за здравство за испраќање на еден анестезиолог во ГОБ 8ми Септември, со што се создаваат услови за зголемен обем на хируршки интервенции, вели директорот Христијан Костов.

Истовремено, Костов нагласува дека сиот изминат период, ГОБ „8 Септември“ ниту во еден момент не престана со изведување на операции кои биле загрожувачки за животот на граѓаните од државава - операции на малигноми и фрактури.