Хоџа: Се наоѓаме во многу деликатен момент и потребно е да продолжи мнозинството
Објавено во: Македонија 01 Ноември, 2021
Покажавме дека мнозинството е стабилно и дека треба да продолжи, вели Аријанит Хоџа од БЕСА по средбата во Владата, со премиерот Зоран Заев кој синоќа си поднесе оставка.
Вели дека процесите што би воделе до избори би биле тешки за економската и друга состојба во државата.
„Коалицијата има мандат од пред една година и легитимитетот од последните парламентарни избори е доволен да се продолжи и да се оствари тоа што сме го презеле како одговорност. Се наоѓаме во многу деликатен момент и потребно е да продолжи мнозинството“, рече Хоџа.
За оставката на Заев, Хоџа вели дека како коалициони партнери нормално дека не се согласуваат со неа, но тоа е личен чин и став на премиерот и тој ќе одлучи на крајот.
ДОМ, ЛДП, НСДП и ДПА остануваат во владејачката коалиција, соопштија лидерите на овие партии. Претседателот на општинската организација на СДСМ Куманово, Мартин Костовски, преку социјалните мрежи покрена иницијатива за поддршка на Заев. Костовски апелира до сите социјалдемократи во државата за безрезервна поддршка за Заев да остане на лидерската позиција во партијата.