Хрватска е подготвена да им помогне на Србија и Босна за ЕУ

Добивај вести на Viber

Хрватска е подготвена да им помага на своите соседи Србија и Босна и Херцеговина на патот кон Европската унија. 

Ова го изјавил заменик-министерот за надворешни работи на земјата, Гордан Бакота. 

„Сметаме дека српско-хрватските односи се многу важни, не само за двете земји, но и за стабилноста на Југоисточна Европа, во тоа нема сомнение“, посочи тој. 

Дипломатот исто така изјави дека таква помош Загреб сака да и даде и на Босна и Херцеговина со почитување на територијалниот интегритет на земјата и целосна рамноправност на трите народи во неа. 

На прашањето дали може да даде проценка на дипломатските односи меѓу Загреб и Белград Бакота изјавил дека „во Србија во моментов е предизборен период и ние се обидуваме да ги намалиме тензиите во односите, не одговараме на одделни апликации. Сакаме да имаме и имаме канали за дијалог со официјален Белград“, рекол тој, цитиран од агенциите. 

Претходно министерот за надворешни работи на Хрватска Давор Иво Штиер изјавил дека неговата земја има интерес во тоа да ги развива односите со Србија, но тоа е невозможно да се оствари со шефот на српската дипломатија Ивица Дачиќ. 

За оваа причина, според него, каналот за комуникација помеѓу двете држави се одржува од премиерите Андреј Пленковиќ и Александар Вучиќ.