Има се, може се! Која државна фирма ќе плати до милион евра за ладење, греење, осветлување...?
Објавено во: Економија 06 Април, 2023
МЕПСО е услужна компанија која вработува околу 700 лица од кои најголем дел се вработени во нејзината дирекција и во помал дел во петнаесетина трафостаници ширум земјава. Најголем дел од потрошената струја е потребна за климатизација односно греење и ладење. Договорот вреди 1 милион евра од почеток на април до крај на декември годинава.
Истовремено и најголемиот медицински центар во источна Македонија - клиничката болница во Штип склучува договор за снабдување со струја. Оваа здравствена установа која треба да даде медицински услуги за 200.000 жители на Источна Македонија за една година ќе потроши помалку пари за струа за своите потреби
Државната компанија која управува со електропреносниот систем и ја одржува високонапонската мрежа МЕПСО ќе купува струја за 1 милион евра која е наменета за задоволување на сопствените потреби за електрична енергија.
Договорот за набавка на струја за сопствена потрошувачка предвидува МЕПСО во период од почеток на април па до крај на септември годинава да потроши до 1 милион евра (со вклучен ДДВ). Струјата ќе ја набави од ЕСМ Продажба фирмата ќерка на државниот брат (со струја) ЕСМ.
За сите набавени количини на струја МЕПСО ќе плаќа берзанска цена постигната на унгарската берза ХУПЕКС (месечна просечна цена за мегаватчас постигната на таа берза). За својата услуга ЕСМ Продажба ќе наплати трговска маржа од 5 отсто на фактурираната цена на струјата.
МЕПСО е државна фирма која има дирекција во центарот на Скопје и располага со петнаесетина трафостаници ширум државата во кои има свои вработени лица. Вкупниот број на вработени во МЕПСО е околу 700 лица, а повеќе од половина од нив се во зградата Дирекција во центарот на Скопје. Другите вработени се технички персонал (електромонтери, вклопничари, погонски електричари и помошен персонал распореден на работни места во трансформаторските станици со кои управува МЕПСО).
Со оглед на тоа дека МЕПСО е услужна, а не е производствена компанија значаен дел од потрошената електрична енергија е наменета за греење и за ладење (климатизација) на канцелариите пред се на дирекцијата на таа државна компанија. Повеќе детали за таа набавка има на следниот линк https://e-nabavki.gov.mk/PublicAccess/home.aspx#/dossie-acpp/bb2be07a-28b0-4c3d-a450-3b9593e450fc
Верувале или не МЕПСО троши повеќе струја од Штипската клиничка болница!
Истовремено со тендерот за струја на МЕПСО е објавена и набавката за потребите на штипската клиничка болница – најголем здравствен комплекс кој треба да ги задоволува потребите на повеќе од 200.000 жители во Источниот регион на Македонија.
За идните 12 месеци оваа најголема здравствена установа за снабдување со електрична енергија на сите клиники ќе плати на тендер до 863.500 евра со вклучен ДДВ. Набавувач е истата државна компанија ЕСМ Продажба, фирма ќерка на ЕСМ. Цените за струја ќе ги наплаќа по истата методологија како и на МЕПСО односно просечната месечна пазарна цена за мегаватчас струја постигната на унгарската берза ХУПЕКС зголемена за маржа од 5%.
Тендерот е на следниот линк https://e-nabavki.gov.mk/PublicAccess/home.aspx#/dossie-acpp/fe77eea7-42c2-4279-8381-114e7c0e3161
Р.Ф.foto freepik.com/bushalex