Инспекторатот за животна средина по пожарот се сели во барокната палата „Емануел Чучков“
Објавено во: Македонија 29 Септември, 2020
Државниот инспекторат за животна средина се сели во барокната палата „Емануел Чучков“ по пожарот кој избувна и ги пеплоса неговите канцеларии во поранешната банка на Комерцијална банка во близина на македонската Филхармонија на кеј „Димитар Влахов“ каде се сместени и други јавни и државни институции.
Владата со одлука за времено користење од шест месеци му ги преотстапува канцелариите на инспекторатот кои до сега ги користеше Службата за општи и заеднички работи на „Бихаќка“ во Скопје каде што се сместени и Државен завод за ревизија и Геолошкиот завод.
Станува збор за 16 канцеларии кои ќе ги добие Државниот инспекторат за животна средина, кои пеплосаните простории ги користеше од јануари 2015 година.
Од таму по пожарот соопштија дека серверите за е-пошта и интернет страницата воопшто не се сместени во работните простории, туку се управувани од надворешна фирма. Серверот со податоци била во просторија која според информација од пожарникарските служби кои учествуваа во гаснење на пожарот воопшто не е опожарена.
Од таму по една недела од инцидентот информираа дека комплетно се обновени печатите и сите книги за непречено административно-писарско работење, како и тоа дека приемот на пошта и реализацијата на јавните набавки се одвива непречено. А.К.