Иванов нема да дава финансиски отчет преку владина алатка
Објавено во: Македонија 22 Јуни, 2018
Од Кабинетот на претседателот Ѓорге Иванов велат дека транспарентно ги трошат парите од буџетот и јавно ги објавуваат, но дека немаат намера да ги користат алатките на Владата на РМ за јавни расходи.
Владата изутрина по потсети Иванов дека не добила повратен одговор од него дали ја прифаќа или не можноста на отворен начин, преку Алатката за отчетност, да им покаже на граѓаните како ги троши нивните пари.
Кабинетот на Претседателот додава дека нема законска обврска да прифаќа дополнителни „алатки“.
„Иванов, изминатите девет години, максимално одговорно, совесно и на транспарентен начин располага со буџетските средства. Во таа насока, потенцираме дека сите јавни набавки од страна на Кабинетот на Претседателот се извршени на максимално транспарентен начин и согласно сите законски регулативи и истите се јавно достапни“, стои во соопштението на претседателскиот кабинет.
Додаваат дека овој податок го потврдуваат и ревизорските извештаи за работењето на Кабинетот на претседателот спроведени од страна на Државниот завод за ревизија.
„Со цел објективно информирање на јавноста, Кабинетот на Претседателот на Република Македонија, како и досега, така и во иднина, целосно стои на располагање за било какви информации кои се однесуваат на финансиското работење и трошењето на народните пари за службени потреби“, се наведува во соопштението.
Институтот Претседател на РМ и Владата на РМ се во постојан конфликт во последните година дена, а кулминацијата беше одбивањето на Иванов да го прифати договорот од Преспа постигнат помеѓу Скопје и Атина.