Избегната ли е трговска војна меѓу Македонија и Србија?

Добивај вести на Viber

По загрижувачките тонови кои пристигнаа од српска страна и министерот за трговија Љајиќ за контра мерки против Македонија поради новиот Правилник за увоз на брашно, двете страни најверојатно најдоа начин да избегнат отпочнување на трговска војна со кревање на давачки за меѓусебни трговски стоки. 

За таа цел Македонија и Србија ќе формираат меѓувладин комитет за решавање на трговските бариери и унапредување на размената.

Целта на комитетот, но и воопшто на заложбите на владите на Македонија и на Србија, е трговската размена од сегашните 760 милиони евра, како што предочи Љајиќ, годинава да достигне милијарда евра.

Комитетот првпат ќе заседава на 14 март во Белград, а ќе ги нотира сите бариери кои постојат од едната или од другата страна. Ќе се дискутира и за извозот на македонските производи: вино, алкохол, тутун…, како и за меѓусебното признавање на сертификатите меѓу двете земји. Воедно ќе бидат понудени конкретни решенија.

– Комитетот ќе ја разгледа и оправданоста на маркичките за брашното и нема да има проблем тие да се укинат ако стопанствениците побараат или имаат интерес за такво нешто, рече Николовски по состанокот.

Министрите вчера во Скопје договорија за увозното брашно од еден, два и пет килограми маркичките да се лепат во Србија, а за пакувањата од 25 и 50 килограми да се ставаат во Македонија. По средбата истакнаа дека двете страни направиле отстапки за да се дојде до решение на проблемот.

– Ова е почеток на долгорочно решавање на сите проблеми меѓу двете влади во делот на земјоделството и трговијата, потенцираа министрите на Македонија и Србија.

Николовски рече дека Правилникот, согласно договореното, ќе биде сменет веднаш.