ИЗБОРНА ТРКА НА ТРАМП И КЛИНТОН: Што го чека доларот во пресрет на изборите во САД?
Објавено во: Свет 07 Ноември, 2016
Инвеститорите на финансиските пазари станаа невообичаено активни во пресрет на претседателските избори во САД, а во изборната ноќ би можело да дојде до значајни поместувања на курсот на валутите и вредноста на акциите, според анализа на брокерската куќа Адмирал Маркетс.
Во анализата, Адмирал Маркетс направи две сценарија на можни движења на стоковните и валутни берзи - прво во случај да победи кандидатот на Демократската партија Хилари Клинтон, а второ ако победи нејзиниот ривал, републиканскиот кандидат Доналд Трамп.
„Со оглед на пазарните движења во последните десет дена, може да се очекува дека победата на Клинтон позитивно влијаела на доларот и цената на акциите, а негативно влијае на цената на златото“, проценува оваа брокерска куќа.
Бидејќи инвеститорите нејзината победа ја перцепираат многу веројатна, ова сценарио,како што се додава, во голем дел е вкалкулирано во моменталните цени.
Тоа значи дека ако Хилари Клинтон победи, американскиот долар во следните неколку дена во однос на останатите валути би зајакнал не повеќе од 1,0 до 2,0 отсто, вредноста на акциските индекси веројатно би пораснала неколку проценти, додека цената на златото би паднала неколку посто.
Во анализата се наведува дека, со оглед на тоа дека Трамп не е фаворит, неговата победа би била изненадување, па реакциите на финансиските пазари во ова сценарио би биле посилни.
„Однесувањето на инвеститорите во последните дена укажува на тоа дека во случај на победа на Трамп инвеститорите капиталот би го префрлиле надвор од САД. Тоа би предизвикало краткорочно слабеење на американската валута во однос на повеќето останати најтргувани светски валути од можеби дури 3,0 до 4,0 отсто во деновите после изборите, и нагло паѓање на цените на акциите и раст на цената на златото“.
Аналитичарите од Адмирал Маркетс сметаат дека без разлика на победникот, пазарот ќе се смири во рок од неколку дена, и дека судејќи по американските претседателски избори одржувани во последните неколку децении, не треба да се очекува значајна промена на досегашните трендови на пазарот