ИЗМЕНИ: Се менуваат критериумите за половни возила
Објавено во: Економија 01 Април, 2015
Доколку во иднина ќе сакате да увезете старо возило, најновата измена на Законот за трговија која е во фаза на подготовка вели дека ќе мора да регистрирате фирма.
Оваа потреба Министерството за економија ја наметнува како што велат од потребата да се регулира увозот на употребувани моторни возила од страна на физички лица, односно да се утврди можноста за да се утврдат соодветни ограничувања при увозот на употребувани моторни возила од страна на физички лица, и да се дорегулира вршењето на трговијата со употребувани моторни возила.
Досегашната практика според Министерството за економија покажала дека голем број од граѓаните увезуваат возила на свое име, а потоа ги препородаваат и на овој начин прават нелојлана конкуренција на фимирте увезници во земјава и затоа овие измени во Законот ќе ја оневозможат нелојалната конкуренција во однос на трговијата со автомобили.
„Трговијата со употребувани моторни возила се одвива во согласност со Законот за трговија и подзаконските акти донесени врз основа на истиот. Според постојните одредби, трговија со употребувани моторни возила можат да вршат правните и физичките лица кои се регистрирани за трговија со употребувани моторни возила во Централниот регистар“, објаснуваат од Министерството за економија.
Овие лица не се регистрирани за трговија и претставуваат нелојална конкуренција за регистрираните дилери - стои во понатамошното објаснување од Министерството.
Основната цел на овој Закон е да се овозможи преку воспоставување на правна законска рамка да не се дозволи нелојална конкуренција при трговијата со употребувани моторни возила и да се постигне одреден напредок во сузбивање на сивата економија, како и да се створат еднакви услови за вршење на трговијата со употребувани моторни возила.