ЈИЕ 2020: На Балканот за осум години 600.000 нови работни места

Добивај вести на Viber

Македонија е втора економијата во регионот според бројот на нови работни места, 103 илјади и во однос на овој перформанс бележи раст од 71 отсто во последните осум години, односно од 2010 до 2018-та, забележува Брисел за Стратегијата за раст на регионот на Југоисточна Европа 2020 (ЈИЕ 2020).

Ова е содржано во резултатите од спроведувањето на Стратегијата ЈИЕ 2020, што беа презентирани денеска во Брисел на состанокот на Советот за регионална соработка, чија членка е и Македонија.

Растот на трговијата во Македонија, според резултатите, е оценет како одличен и забележано е речиси двојно зголемување изминатите седум години, од 6,9 милијарди евра на 12,5 милијарди евра.

Македонската економија, според резултатите, е меѓу лидерите во регионот со 71.062 нови високо квалификувани работници на пазарот на труд.

Економијата бележи прогрес и во однос на параметрот БДП по глава жител и сегашната стапка изнесува 37 отсто, придвижувајќи се од 34 отсто во 2010 година, а целта во 2020 е 43 проценти.

Генерално во резултатите е наведено дека земјите од Западен Балкан се вратиле на патот на растот со дополнителни повеќе од 600 илјади нови работни места од 2010 година досега и 500 илјади нови високо квалификувани работници.

Регионот бележи и раст на трговијата со дополнителни 33 милијарди евра, како и намалување на трговскиот дефицит од минус 23,1 на минус 19,7 отсто од БДП во изминатите седум години, пред се преку  силниот извоз, кој го сигнализираше зголемувањето на конкурентноста на производите и услугите на меѓународните пазари.