Јовановски: Има можност за производство и во ноќна смена

Добивај вести на Viber

Компаниите коишто се регистрирани за работење во смени и ноќна работа и имаат потреба од одржување на континуитет на работниот процес, имаат можност да добијат дозвола за движење на вработен, информира денеска Зоран Јовановски, Главен советник на Управниот одбор на Стопанската комора на Македонија. Комората има и други сугестии.

„На интернет страницата на Стопанска Комора на Македонија (www.mchamber.mk) компаниите можат да најдат образец за издавање на Дозвола за движење на вработен поради вршење на сменска и ноќна работа. За да биде валиден овој образец, компаниите регистрирани за работа во смени и ноќна работа кои работат во трета и четврта смена во времетраење на полицискиот час, треба овој образец да го пополнат со потребните информации за работникот, да го вчитаат на нивен меморандум и да стават потпис и печат од одговорното лице во правното лице. Ваквата дозвола за движење ќе важи исклучиво за лицето на чиешто име е издадена исклучиво од компаниите кои се регистрирани за работа во смени. Дозволата ќе биде потврда за движењето на работникот во услови на воведен полициски час и истата ќе треба да се приложи на увид до органите на државата, рече Јовановски.

Соопшти дека Стопанската комора на Македонија ја поздравува иницијативата на претседателот на Владата и одржувањето на првата седница на новоформираниот економски совет, замислен како тело што ќе се состанува по потреба. Јовановски вели дека комората принципелно нема да коментира мерки на политичките партии од земјава кои беа јавно презентирани викендов. 

„Стопанската комора на Македонија го искажува својот став за економски мерки предложени или преземени од страна на Владата и во тој контекст нема да коментира предлози на политички партии. Сепак, охрабрува тоа што очигледно во земјава се постигнува широк консензус во перцепциите дека постојнава ситуација бара длабоки и сеопфатни мерки. Во оваа прилика сакаме да и’ порачаме на Владата дека какви економски мерки и да донесе, најдобро би било тие да немаат одложено дејство од април, туку мерките да бидат со важност веднаш, вели Јовановски.