„ЈП Водовод и канализација“ ги пакува куферите, од утре влегува во барокната зграда

Добивај вести на Viber

Наскоро „ЈП Водовод и канализација“ ќе работи од новата барокна зграда.

Ова претпријатие почна да ги пакува куферите и од утре се сели во барокното седиште.

Во 2014 Скопски „Водовод“ зема кредит за да ја догради барокната зграда.

Поради одолговлекувањето и проблемите со градежната фирма која беше избрана за изградба на новата административна зграда на ЈП „Водовод и канализација“ , претпријатието во 2014 се задолжи 7 милиони евра за доизградба на објектот. 

Советниците на опозициската партија СДСМ се спротивставија на донесувањето на одлуката за задолжување на ЈП „Водовод и канализација“. Според нив ова јавно претпријатие треба да посвети поголемо внимание на обновата на водоводната мрежа во главниот град, како и на замена на азбестните цевки. Наместо да се довршува, советниците на СДСМ предложија да се продаде идната управна зграда на ЈП „Водовод и канализација“. Ако се земе во предвид предвидената каматна стапка од 8 проценти на годишно ниво, тогаш излегува дека ова јавно претпријатие за десет години ќе треба да врати вкупно 10 милиони евра.

Директорот, Бојан Василевски, тогаш потенцираше дека задолжувањето е неопходно, бидејќи веќе три ипол години плаќаат месечна кирија од 25.ооо евра.

„Имаше голем период застој поради тоа што градежната фирма „Алпине Бау“ отиде во стечај. Три ипол години плаќаме месечна кирија од 25.000 евра.  Досега за изградбата на зградата е исплатено околу два милиони евра, а комплетната изведба ќе чини околу 10 милиони евра колку што беше предвидено на стартот. Одлучивме да се задолжиме за да не се стави претпријатието во незавидна положба , да не може да си ги исплаќа тековсите активности, плати и оддржување на мрежата “, посочи тогаш Василевски.

Изградбата на управната зграда на „Водовод и канализација“ започна во декември 2011 година, а првичниот рок за нејзино завршување изнесуваше три години. Поради банкрот на изведувачот на градежните работи, градилиштето е ставено во мирување уште од јуни 2013 година.

Фото: билд.мк