Како „Комерцијална банка“ му подари милион евра на „Гранит“?

Добивај вести на Viber

Вредноста на акциите што „Гранит“ ги поседува во „Комерцијална банка“ додадоа 1,1 милиони евра во добивката на компанијата. Оперативната добивка е 144.600 евра

Најголемата македонска градежна компанија „Гранит“ имаше феноменален квартал од аспект на приходите од продажба. За првите три месеци лани компанијата оствари приход од продажба во износ од 13,9 милиони евра и тие во споредба со истиот период лани се повисоки за 2,7 пати. Компанијата има оперативна добивка од 144.600 евра што е 1 отсто од приходите од продажба затоа што оперативните расходи се на ниво од 14,4 милиони евра. Вкупните оперативни приход на „Гранит“ за првите три месеци се 14,56 милиони евра.

Доминантен дел од приходите се остварени на домашниот пазар и тие изнесуваат 13,82 милиони евра.  А најголема расходна ставка се услугите со карактер на материјални трошоци кои изнесуваат 6,34 милиони евра. Во овој период компанијата имала позитивна разлика меѓу финансиските приходи и финансиските расходи и таа изнесува околу 23.000 евра.

Клучен фактор што влијае врз профитот на компанијата во овој период е капиталната добивка од акциите на „Комерцијална банка“ што лани во првиот квартал од годината ги купи „Гранит“. Според билансот на успех нивната пазарна цена придонесува во добивката со 1,1 милиони евра. Соодносот на профитот од дејноста и профитот од капиталната добивка се 6 наспрема 1 во корист на капиталната добивка.

Колку капиталната добивка се меша во ќарот на „Гранит“?

Половина од добивката на „Гранит“ лани нема никаква врска со дејноста на фирмата. Капиталната добивка направена како разлика од куповната и пазарната цена на акциите на „Комерцијална банка“ што ги поседува „Гранит“ изнесува 2,38 милиони евра, а добивката од оперативното работење е 1,8 милиони евра.