Како Македонија и Грција ќе се поврзат преку гасовод?

Добивај вести на Viber

Прв посериозен проект помеѓу Македонија и Грција во услови на нормализирање на политичките односи ќе биде поврзување на двете земји со гасоводна инфраструктура преку интерконектор, од што голем бенефит ќе имаат крајните потрошувачи, но и бизнисмените на двете страни бидејќи соработката ќе се интензивира, а економијата ќе расте. Барем, ова е првото очекување на МЕР, државната компанија за гасовод на Македонија која пренесе многу позитивни впечатоци по средбите остварените со рчката компанија за управување на систем за пренос на природен гас во Грција (ДЕСФА). За почеток разговарано е за одредена временска рамка во која би се реализирал проектот за гасоводно поврзување, трасата и останатите детали.

„Согласно мерките за градење доверба помеѓу Република Македонија и Република Грција, и интензивирањето на билатералната соработка иницирана од премиерите на двете земји, експертите се согласија дека Проектот е добро решение за Македонија и Грција и отвора можности за продлабочување на соработката во енергетиката но и поттикнување на регионалната енергетска соработка на Балканот, во согласност со државните енергетски политики на двете земји и заедничката енергетска политика на Европската унија. Така, создадените услови за соработка на политичко ниво иницираа започнување на активностите за реализација на проектот на техничко ниво“, соопштија од Владата на РМ.

Со овој проект ќе се изградат околу 120 километри гасоводна мрежа, (околу шеесет километри на македонска и шеесет километри на грчка страна), а Македонија почнува иницијатива за развој на нови гасни коридори во Југоисточна Европа.

„Реализацијата на овој проект е од особено значење за Република Македонија бидејќи се создаваат услови за приклучување на земјата кон проектот ТАП како и користење на течниот природен гас (ТПС) од резервоарите во Грција. Со тоа ќе се овозможи транзитирање на природниот гас низ Македонија кој понатаму може да се користи и од потрошувачите на останатите земји во регионот, со што ќе се поттикне развојот на инфраструктурата за земјите од Западен Балкан“ велат од Владата.

Следува изработка на физибилити студија која ќе ги опфати техничките и економските аспекти на гасното поврзување и ќе понуди конкретни решенија за потребната инфраструктура на територијата на двете држави. За почеток, предвидено е гасоводната линија да има технички проектни перформанси од 2 до 3 милијарди кубни метри гас.

Засега конкретни финансиски детали и бројки не се споменуваат, освен што постои подготвеност двете земји заеднички да аплицираат за средбства пред меѓународните банки и кредитори за реализација на целосниот проект.

Македонија подолго време најавува целосна гасификација за најдобро енергетско поврзување на сите домаќинства и крајни потрошувачи, за обезбедување на поевтин енергенс и пониски трошоци, заштита на животната средина со намалувањена ЦО2, како и давање поголем стимул на економските субјекти.