Караџовски: И во соседството се подготвуваат за избори, никој никаде не го прекинал изборниот процес поради ковид

Добивај вести на Viber

Жарко Караџовски, шефот на Комисијата за заразни болести, во интервју за „Слободна ТВ“ денеска вели дека Државната изборна комисија го добила од нив протоколот за спроведување на предвремените парламентарни избори и дека критериумите за заштита и претпазливост се истите кога и тие да се одржат.

– Да, комисијата доби задача да изготви изборен протокол. Никој никогаш не ни рекол кога ќе бидат изборите. ДИК во полн состав беше повикана кај нас, а од нас беше побарано да им дадеме критериум за да се спроведе изборниот ден. Комисијата изготви протокол и тој е доставен до ДИК. Но, ние кажавме дека не можеме да проектираме во кој период може да има избори. Само кажавме кои критериуми треба да се задоволат за да се спроведат. И во соседството се подготвуваат за избори. Никој, никаде не го прекинал изборниот процес поради ковид. Затоа што никој во нашиот нормален живот нема да се зарази ако ги почитува мерките за заштита, за дистанца, ако носи маска или ако се дезинфицира. Значи, направивме протокол кој важи кога и да се одржат изборите, одговара Караџовски на едно од прашањата.

Негово мислење е дека за ширење на коронвирусот се виновни и граѓаните, кои не ги почитуваат мерките, но и сите други.

- За време на првомајските празници ние како стручна комисија издадовме соопштение за мерки на претпазливост, но Главниот кризен штаб и Владата усвоија нешто сосема друго, вели Караџовски.

Додава дека зад себе работел на 35 епидемии и според тоа искуство на почетокот прогнозирал дека ќе имаме над 2.000 позитивни и 150 до 200 смртни случаи од корона вирусот.

Караџоски очекува вакцина кон крајот на 2021 и почетокот на 2022 година.