Катица Јанева: Будно следете го предметот „Таргет Тврдина“
Објавено во: Македонија 12 Јуни, 2019
Главната обвинителка на СЈО, Катица Јанева, ја повика јавноста внимателно да го следи судскиот процес на предметот „Таргет Тврдина“ за време на денешната конференција во организација на ОБСЕ.
Таа ги негираше тврдењата на поранешниот директор на УБК, Сашо Мијалков, кој вчера за време на рочиштето во судницата рече дека бил предмет на прислушување. Мијалков како обвинет во случајот тврдеше дека не може да се гарантира дека не прислушувал некој друг.
-Обвинетиот Сашо Мијалков не бил таргет во прислушувањето, но биле други блиски до него фамилијарно. А тоа кој прислушувал има докази дека прислушувањето се случувало додека тој бил директор на УБК и по негова наредба. Има докази за тоа во предметот на СЈО и апелирам до јавноста будно да го следи овој предмет – рече Јанева на денешната конференција во организација на ОБСЕ.
„Опремата по случаен избор ги фаќа броевите од најблиската базна станица, па така го видов бројот на мој пријател, чиј разговор го слушавме. По тоа што заедно го слушнавме, како можете да гарантирате дека некој на ваков начин нема извршено вакво прислушување?“ беше едно од прашањата кое вчера Сашо Мијалков му го упати на сведокот Звонко Костовски.