Ќе се протестира пред Собрание против Законот за јазиците
Објавено во: Македонија 14 Март, 2018
Денес во 12 часот ќе се одржи протест пред Собранието на Република Македонија против носењето на Законот за употреба на јазиците кој откако доби вето од претседателот на државата Иванов треба по втор пат да биде ставен на гласање.
Собранискиот спикер Талат Џафери најави дека поднесените 35 илјади амандмани од опозициската партија ВМРО-ДПМНЕ нема да бидат разгледани бидејќи нема правна основа, односно законот веќе е поминат во сите процедури на расправа и сега треба само да се прегласа.
Со ова не се согласува ВМРО-ДПМНЕ која најави дека се можни блокади на Собранието ако не биде испочитувана нивната политичка волја да не се носи законот во кој има многу правни и уставни недоследности и бараат законското решение за употреба на јазиците да се подобри.
Засега протестот кој се најавува напладне нема официјални организатори, туку се вршат повици за излегување пред Собрание преку социјалните мрежи.