Ќе се вработуваат по општини, јавни петпријатија, агенции, фондови - ГРУБИ ИМ НАЈДЕ МЕСТО НА „РАМКОВНО ВРАБОТЕНИТЕ“

Добивај вести на Viber

Министерството за политички систем и односи меѓу заедниците вчера соопшти дека во согласност со законските обврски, до Владата ги доставил информациите со планот за распределба на административните службеници. 

Во соопштението се наведува дека првиот вицепремиер и министер за политички систем и односи меѓу заедниците, Артан Груби го доставил планот за распределба на административните службеници две недели пред крајниот рок утврден од Владата. 

Од соопштението може да се разбере дека најголем дел од „рамковните вработени“ сега ќе добијат работни столчиња низ општините во земјава, иако ќе се вработува и низ другите државни институции.

„Согласно член 4 став (1) од Законот за преземање на административни службеници вработени преку K5 програмата во Министерството за политички систем и односи меѓу заедниците, вкупно 1.357 административни службеници ќе бидат распределени во вкупно 258 институции на локална самоуправа и други државни органи основани во согласност со Уставот и законот“, се наведува во соопштението. 

Оваа категорија  вработени, како што се наведува, ќе бидат систематизирани во институции кои вршат активности од областа на образованието, науката, здравството, културата, социјалната заштита и заштитата на децата, спортот, како и други дејствија од јавен интерес утврдени со закон и организирани како јавни агенции, фондови, институции и претпријатија основани од земјава, или од општини, од Град Скопје, но исто така и од општини на град Скопје и државни акционерски агенции. 

Првиот вицепремиер Груби вели дека Планот ги опфаќа вработените во Министерството за политички систем и односи меѓу заедниците, кои засновале работен однос заклучно со 31 декември 2019 година. 

„Согласно планот, вработениот ќе биде распореден во друга институција на работно место на исто ниво односно на работно место за кое вработениот ги исполнува општите и посебните услови утврдени во актот за систематизација на работни места во институцијата во која се распоредува“, се наведува во соопштението од Министерството за политички систем и односи меѓу заедниците.