Кои се најголеми „пациенти“ на банките?
Објавено во: Економија 30 Ноември, 2018
„Арчелор Митал“ ХРМ, „Макпетрол“, земјоделскиот комбинат „Пелагонија“, „Макстил“ и „Топлификација“ се компаниите кои во првите девет месеци годинава имаат најголеми финансиски расходи, покажуваат нивните официјални податоци објавени на берзата.
Во ставката финансиски расходи најзначајно, доминантно или целосно учество имаат расходите што компаниите ги имаат за камати за нивните заеми и кредити спрема банките во земјава. Според достапните податоци овие пет компании имаат финансиски расходи од 6,85 милиони евра за девет месеци што значи дека најголем дел или сите пари завршиле во банките за отплата на нивните кредити.
Најмногу плаќа „Арчелор Митал“ ХРМ кој за првите девет месеци има финансиски расходи од 1,7 милиони евра и тие се пониски во однос на лани кога изнесувале 2 милиони евра. „Макпетрол“ за периодот јануари – септември има финансиски расходи од 1,4 милиони евра, а битолскиот комбинат „Пелагонија“ 1,38 милиони евра. Следниот е „Макстил“ кој исплатил 1,2 милиони евра, а во големата петорка изненадувачки е „Топлификација“ со 1,17 милиони евра.
Во најголемите десет компании според финансиски расходи се уште: скопски „Бетон“, „Скопски пазар“, штипски „Бетон“ и скопски „Жито Лукс“.
Р.Ф.