КОЈ ПЛАТИ НАД 300 ИЛЈАДИ ЕВРА - блокови со акциите на една нафтена компанија, за цена не се прашува
Објавено во: Економија 14 Јуни, 2024
Вчера беа објавени две блок трансакции со акциите на нашата најголема нафтена компанија „Макпетрол“, од кои едниот на прилично значаен износ.
Двата блока биле на различни количини, но акциите се продале по иста цена.
Всушност, на првата блок трансакција се продале 200 акции по цена од 84.000 денари за акција, што значи дека некој за овие акции вкупно платил над 273 илјади евра.
Вториот блок бил помал, односно поминале 32 акции, по истата цена, па вредноста на оваа трансакција е околу 44 илјади евра.
Дали е истиот купувач, или се двајца различни на двата блока, засега не е познато.
Но, факт е дека компанијата секогаш транспарентно известува доколу дополнителни акции купиле или позначајните акционери, или од раководниот тим на компанијата.
А, во текот на вчерашниот ден, кога се реализираа блок трансакциите, раст доживеа и цената на акцијата на „Макпетрол“ на редовниот пазар, па таа достигна уште повисока цена од онаа на блокот, односно 84.237 денари по акција. Притоа треба да се има предвид дека еден ден претходно акцијата на оваа нафтена компанија се продавала по прилично пониска цена од 81.896 денари. Тој ден односно завчера се истргувале 124, а вчера само 27 акции на нафтената компанија.
Н.Н.Ф.