КОЈ СЕ ВОЗБУДИ ОД НАЈАВИТЕ ЗА КРАТЕЊЕ НА 20 ОТСТО - КСС бара да престанат заканите кон администрацијата
Објавено во: Македонија 09 Август, 2020
Конфедерацијата на слободни синдикати бара да престанат, како што велат, заканите дека новата влада ќе отпушти 20 отсто од администрацијата, или 30 илјади работници.
„Наместо лидерот на СДСМ, Зоран Заев да најавува отпуштање на 20 отсто или 30.000 работници од јавниот сектор, во интерес на државата и сите граѓани на нашата држава, бараме Владата да го спроведе законот за работни односи и да се погрижи за сите социјално загрозени семејства и работници или во спротивно ќе следи социјална криза“, се вели меѓу другото, во вчерашното соопштение од КСС.
А најавите дека ќе мора да се рационализира администрацијата за најмалку 20 отсто од кадарот кој не ги извршува соодветно работните задачи, беше една од посериозните во последната предизборна кампања на СДСМ и Зоран Заев.
Впрочем, и пред претходните избори се најавуваше дека администрацијата ќе се рационализира, но потоа не излезе ништо од тоа.
Не се реализираше ниту идејата дел од тие вработени, ако сакаат, да бидат преземени од приватниот сектор.
Доколку успее да ја формира Владата, од Зоран Заев би било несериозно доколку не го исполни ова предизборно ветување.
Дотолку повеќе што се покажа дека дел од вработените во администрацијата кои не ангажираат доволно и професионално, се јавија како главни кочничари на многу рефорски процеси.