Кој си купи акции во „Комерцијална банка“ за 851.000 евра?

Добивај вести на Viber

Денеска  е можно да стане јавен податокот кој купи 10.000 акции за 851.000 евра во една блок трансакција на 6 јули и тоа ќе се случи ако купувачот со тие акции стане сопственик на повеќе од 5 отсто или можеби „Адора Инженеринг“ ги купила за да ја зајакне својата и така доминантна позиција?

„Комерцијална банка“ продолжува да биде во фокус на интерес на инвеститорите на македонскиот пазар на капитал. Денеска е можно да добиеме информација кој е новиот акционер во таа банка кој вложи 851.000 евра во акции откако на 6 јули купи 10.000 акции ( 4,4 отсто) од акциите со право на глас по цена од 5.250 денари за акција. 

Според актуелната состојба на акционерската структура во „Комерцијална банка“ која важи до 16 јули оваа компанија има само еден акционер кој е во книгата на јавни сопственици на акции. Тоа е скопската градежна компанија „Адора Инженеринг“ која има 8,11 отсто од акциите. Во банката има 4.522 физички лица кои поседуваат 40,87 отсто и 313 правни лица кои заедно поседуваат 51,9 отсто од кои најголем е „Адора“ која поседува 8,11 отсто. Учеството на странските инвеститори е незначително затоа што вкупно 119 правни и физички лица поседуваат 7,12 отсто од управувачките права во банката.

Доколку станува збор за еден купувач и тој веќе имал акции во „Комерцијална банка“ со последната блок трансакција тој ќе стане дел од јавниот регистар ако го исполни цензусот да поседува барем 5 отсто од акциите во банката. Доколку има промена во структурата „Фактор“ навремено ќе извести.

Очигледно е дека „Комерцијална банка“ е предмет на консолидација во акционерска смисла на зборот. Затоа што видливо е дека има трансакции со големи количества акции и тоа значи дека тече процес на окрупнување на сопственост во таа голема македонска банка.

Како што веќе пишувавме од крајот на првиот квартал досега интензивно во акции на „Комерцијална банка“ инвестираше „Адора Инженеринг“ која според наши слободни проценки вложи околу 10 милиони евра и стана најголем поединечен акционер во таа банка.