Која македонска фирма со купи-продај сврте 170 милиони евра?
Објавено во: Економија 17 Јануари, 2019
Македонската берза има година за памтење. Прометот лани е 169,32 милиони евра. Блок трансакциите донесоа половина од прометот и тоа е очекувано. Но важно е тоа што класичното тргување (кор дејноста на берзата) порасна за 68 отсто во однос на 2017 година и достигна 80 милиони евра. Ова значи дека во значајна мерка домашни инвеститори (физички лица и фирми) одлучиле да вложат во хартии од вредност, а најмногу во акции. Само за потсетување значајно учество во овој промет е вложувањето на неколку домашни фирми во акции на „Комерцијална банка“ минатата пролет
Убедливо најтргувана акција лани била „Комерцијална банка“ со вкупен промет што во класично тргување надминува 23 милиони евра. Акција со највисок „фри флоат“ е убедливо „Стопанска банка Скопје“ кај која од слободните нешто над пола милион акции (тие што не се во сопственост на НБГ од Грција) се истргувани повеќе од половина односно над 285.000 акции, а вкупниот промет достигнал до речиси 5 милиони евра. Акцијата на„Алкалоид“ е фикс и таа е втора најтргувана со промет од 9,3 милиони евра. Во „големата четворка“ на берзата лани била и акцијата на НЛБ Банка со промет од 5,5 милиони евра. За „Комерцијална банка“ рангот е очекуван особено заради стимулацијата за домашните инвеститори по влезот на неколку домашни големи фирми во нејзината акционерската структура по излезот на шведскиот инвестициски фонд. Тука мора да се надополни и за стимулот за добрите резултати на банката и големите очекувања за претстојната дивиденда. Дивидендата е главна причина за солидните обеми на тргување со акциите на „Стопанска банка“ и на НЛБ Скопје, а „Алкалоид“ е акцијата –обврзница која во континуитет со години наназад дели предвидливо зголемени износи на дивиденда и е „коњак“ за институционалните инвеститори. Во големата петорка, заслужено според големината, влегува и нафтено-трговскиот гигант „Макпетрол“ каде нормални и очекувани вести станаа раст на приходи, зголемени добивки и пристојна дивиденда која е уште зад другите најдобитни акции, но има силен потенцијал.
Од официјалните податоци се гледа дека во сите друштва од МБИ-10 (со исклучок на Охридска банка) се зголемува учеството на домашните инвеститори за сметка на странците.
Помина ли зимата за брокерските куќи?
Добра вест и за брокерските куќи , малата бизнис заедница, која до лани имаше тешки години. Резултати покажуваат дека и кај нив има оптимизам за иднината. Убедливо најголем промет во класично тргување има „Илирика Инвестментс“ надмина 44 милиони евра. Втора е „Еурохаус“ со реализација во класично тргување од 24 милиони евра, за нијанса повеќе од брокерите на „Комерцијална банка“: НЛБ има промет од 15 милиони евра, а брокерите на „Шпаркасе“ и на ТТК Банка се над маргината од 10 милиони евра. Кај блок трансакциите неприкосновена е „Комерцијална банка“ со промет од 95 милиони евра.
Р. Ф.