Колкав буџет ќе трошиме в година: Повисоки плати за администрацијата, пари и за НАТО
Објавено во: Економија 19 Декември, 2018
Прогресивен данок, поголеми пензиски и здравствени придонеси, пари за подготовка за влез во НАТО, ама и за раст на платите на административците, на вработените во градинките и училиштата, социјална пензија и гарантиран минимален приход - буџетот за в година е пред пратениците, а во своето експозе министерот за финансии Драган Тевдовски рече дека во 2019 година ќе има повисок раст и подобор стандард за населението. Владата го скори најобемниот буџет досега.
Вкупните расходи се позиционирани на 228,5 милијарди денари, додека прихдоите изнесуваат 210,8 милијарди денари.
Буџетскиот дефицит е 17,7 милијарди денари или 2,5 проценти од БДП, што е за половина милијарда денари помалку од годинава.
За капитални инвестиции предвидени се 26 милијарди денари. Од нив за патишта и железница се 5,2 милијарди денари, а за вложувања во енергетска и комунална инфраструктура планирани се 5,5 милијарди денари. За образованието, детската заштита и спортот проектирани се капитални инвестиции во износ од 2,8 милијарди денари.
Во областа на правосудството планирани се средства во износ од 529 милиони денари.
Предвиден е раст на БДП од 3,2 проценти.