Колку пари ќе потроши Унгарија на „ловци“ на мигранти?
Објавено во: Свет 30 Ноември, 2016
Унгарија ќе потроши 340 милиони долари за 3000 „ловци" на илегални мигранти.
За овие трошоци нема да важат правилата за јавни набавки. Унгарската Влада ќе потроши до 100 милијарди форинти или 340 милиони долари за подготовка, храна и издршка на околу 3.000 „гранични ловци", кои ќе бидат ангажирани за да ги чуваат оградите, издигнати минатата година против влегувањето на илегални мигранти. Оваа информација ја објавија американските медиуми, повикувајќи се на изјава на унгарски пратеник.
Лајош Ќосја, претседател на парламентарната група на владејачката партија ФИДЕС, вели дека за овие трошоци нема да важат правилата за јавни набавки.
Околу 400 000 мигранти и бегалци преминаа во Унгарија минатата година на пат за Западна Европа, пред премиерот Виктор Орбан да нареди изградба на огради по јужните граници со Србија и Хрватска. Мигрантите кои успеваат да навлезат преку оградата и бидат фатени, се враќаат назад по брза постапка.
Владата во пролетта очекува нов бран мигранти.