Колку вреди ТЕЦ „Неготино“?

Добивај вести на Viber

Независната ревизија утврдила дека вредноста на недвижностите, постројките и опремата се базира на сметководствени прописи кои не се во примена во Република Македонија и не се во согласност со барањата на Меѓународниот сметководствен стандард (МСС)

Независната ревизија не може да ја утврди вредноста на термоцентралата „Неготино“, ладна резерва на македонскиот електроенергетски систем, пишува во извештајот на независната ревизија за работењето на таа компанија во 2017 година. Во својот извештај ревизијата наведува дека недвижностите, постројките и опремата се базираат на сметководствени прописи кои повеќе не се во примена во Република Македонија. Воедно овој сметководствен третман не е во согласност со барањата со Меѓународниот сметководствен стандард (МСС) 16 „Недвижности, постројки и опрема“. Заради тоа ревизорите изнесуваат мислење со резерва за ТЕЦ „Неготино“.

Според официјаните податоци објавени во извештајот на компанијата недижностите, постројките и опремата на ТЕЦ „Неготино“ на крајот на 2017 година имале вредност од 8 милиони евра.  Од тоа вредноста на земјиштето е 6,56 милиони евра, вредноста на зградите е 1,32 милиони евра, а постројките и опремата вредат 105.500 евра.

Приходите на ТЕЦ „Неготино“ лани биле 3 милиони евра, а неговите расходи достигнале 2,92 милиони евра. Позитивната разлика меѓу приходите и расходите на компанијата е позитивна и изнесува 70.000 евра. Лани ТЕЦ НЕготино на Владата, неговиот единствен акционер, исплатил дивиденда од 138.500 евра.

Зошто ТЕЦ „Неготино“ е уникатна компанија?

Ладната резерва на електроенергетскиот систем е уникатна фирма затоа што таму вработените одат на работа, но не работат. Функцијата на ТЕЦ-от е како на резервните тркала во возилата. Постои, но се користи само во крајна нуджа односно по потреба. Оваа компанија е лоцирана во близина на селото Дуброво, во близина на реката Вардар и во близина на Неготино. Погонско гориво е мазутот и нејзиното работење е скапо затоа што нејзината производствена цена е значајно повисока од пазарната цена на електричната енергија. Нејзината намена е да произведува електрична енергија во услови на хаварии или елементарни непогоди кога нема други извори за производство на електрична енергија.
Во ТЕЦ „Неготино“ се вработени 192 лица, според официјалните податоци на крајот на 2017 година. За плати на вработените компанијата лани исплатила 1,85 милиони евра и тоа е најголемата расходна ставка. Нејзините вкупни расходи се 2,92 милиони евра.

Целиот извештај на независната ревизија е достапен на следниот линк.

Р.Ф.