Комисијата за заразни болести идната недела ќе се изјасни за локалите и хотелите, неделава ќе се следат бројките
Објавено во: Економија 16 Јуни, 2020
Комисијата за заразни болести дури идната недела ќе го разгледува барањето на угостителите за тоа дали ќе се дозволи измена на Протоколот за угостителска дејност, со кој се налага на иста маса да можат четворица само доколку се од исто семејство, а во спротивно, да бидат само две лица.
Според сознанијата, идната недела ќе се разговара и ќе се разгледува и протоколот за работа на хотелите, кои официјално не се затворени, но не можат да профункционираат целосно, од причина што нема правила на игра според кои би се организирало работењето.
Од извори во Комисијата за заразни болести Фактор дознава дека оваа недела ќе се почека да се види какви се бројките со новозаразените и воопшто со справувањето на земјава со епидемијата, по што идната недела би се донела издржана одлука за разлабавување на мерките за работа на локалите, односно кафулињата, рестораните и баровите.
А како што веќе пишуваше Фактор, угостителите бараат измена на членовите 8 и 9 од Протоколоот за работа на угостителските објекти, односно да се укине обврската според која на една маса можат да седат четворица само доколку се од исто семејство, или во спротивно, само двајца гости. Исто така, угостителте нагласуваат дека тие не можат да ги легитимираат гостите, односно да бараат од нив документи за идентификација, со кои би докажале дека припаѓаат на една фамилија.
Владата неодамна донесе одлука со која кога се вршат контроли во локалите и рестораните, заедно со инспекторите од Државниот пазарен инспекторат, одат и припадници на Финансиската полиција, кои имаат право да ги легитимираат гостите, за разлика од пазарните инспектори на кои тоа не им е дозволено.
Сето ова за угостителскиот бизнис создава големи непријатности, но и финансиски штети, бидејќи ги принудува вработените да ги враќаат гостите доколку тие не можат да докажат дека се од исто семејство. Тоа, пак, кај посетителите создава револт, и прави тие дури и да сакале да посетат некој локал, да не успеат да го сторат тоа поради строгите правила.
Инаку, во членот 8 се вели дека „на една маса со четири столици можат да седат и да се послужуваат максимум две лица“, додека, пак, членот 9 гласи дека „на една маса со четири столици може да се послужуваат четири лица доколку се од исто семејство“. Исто така, сега локалите смеат да работат само до 22 часот, а тие бараат работното време да биде пролонгирано до 24 часот. Но, и за ова барање, а и за барањето да може да се послужуваат гости во внатрешноста на објектите, а не само на терасите, ќе мора да се изјасни Комисијата за заразни болести. Н.Н.Ф.