Костовски: Спикерот не може да потпише Указ наместо претседателот

Добивај вести на Viber

Дарко Костовски од ВМРО-ДПМНЕ истакна дека Спикерот на Собранието не може да потпише указ за закон се додека претседателот на државата во целост ја врши својата функција, а доколку продолжи да се крши уставот и законите ќе следат нови кривични пријави од опозицијата против членови на власта. 

Без потпис на Указ за стапување на сила на законот за јазици, од страна на Претседателот на државата , секое објавување во Службен Весник и негова понатаможна примена ќе биде нелегална.

- Секој обид да се прескокне потписот на Претседателот на државата, г-нот Ѓорѓе Иванов ќе биде нелегален, вели Костовски..

Тоа значи дека нелегалната и антиделовничка одлука на Собранието која насила ја донесоа на 14 март не е закон се додека не се попише со Указ од страна на Претседателот на државата и се додека врз основа на тој указ не биде објавена во Службениот Весник.

Секоја одлука спротивна на ова ќе биде континуитет на институционалното насилство на кое кумува СДСМ и силувањето на демократијата со цел да се одржи владината коалиција.

Во Македонија постои нешто што е многу поважно од одржувањето на власт на двајца, тројца или десетина политичари, а тоа е уставниот и правниот поредок на државата.

Само за потсетување на јавноста, а посебно на СДСМ. Собранискиот спикер не може да го заменува шефот на државата во услови кога тој во целост ја извршува својата функција. Уставниот суд ваквата постапка ја оценил како противуставна. На ова упатува одлуката од 1998 кога имало ваков обид од страна на Тито Петковски по повод законот за знамиња на националностите.

Петковски тогаш се потпишал на указот на местото на претседателот Киро Глигоров кој бил на службено патување, а по ова Законот за знамиња бил објавен во службен весник со два потписа од тогашниот собраниски спикер. Година дена подоцна Уставниот суд одлучил дека законот е неуставен, а уште побитно како неуставна ја оценил и постапката на Петковски за потпишување на указот, бидејќи на претседателот на Републиката не му престанала  функцијата, ниту бил спречен да ја врши.

Во овој случај уставните судии се повикувале на Членот 92 од Уставот каде што е дефинирано кога собранискиот спикер ја врши функцијата на претседател на државата. Во овој член се утврдени три ситуации кога Претседателот на Собранието е овластен да го заменува. Тоа е:

1. Во случај на смрт, оставка, трајна спреченост или престанок на мандатот на Претседателот по сила на Уставот до избор на нов шеф на државата.
2. Кога Настапилe услови за престанок на функцијата претседател што го утврдува Уставниот суд по службена должност.
3. Во случај на спреченост на претседателот на Републиката да ја врши функцијата.

Ниту еден од овие услови не е исполнет за да може Талат Џафери да си земе за право да потпишува Указ во ме на Претседателот. Секој таков обид ќе биде еклататно кршење на Уставот и тоа, повторуваме, ќе биде дело кое ќе носи политички и кривични последици од сите кои свесно ќе учествуваат, посочи Дарко Костовски од ВМРО-ДПМНЕ на денешната прес конференција.