Крив ли е „ФЕНИ“ за рекордната добивка на „Стопанска банка Скопје“
Објавено во: Економија 15 Мај, 2018
Една од двете најголеми банки во земјава има фантастичен квартал. Нејзината добивка за 90 дена надмина една милијарда денари што е за 57 отсто подобар резултат од истиот период лани. Кога ќе ги видите резервациите станува јасно дека тие значајно ја стимулирале добивката. Кога знаеме дека „Фени“ проработе логично е да претпоставиме дека знајачно ја подобрил „крвната слика“ на „Стопанска банка Скопје“
„Стопанска банка Скопје“ за три месеци оствари добивка од 1,05 милијарди денари што е за 57 отсто повеќе од 2017 година, покажуваат официјалните податоци што сега ги објави банката. Заработката по акција за само три месеци изнесува 60 денари што е значајно повеќе од 38 денари заработка по акција остварена во истиот период во 2017 година. Оваа вест силно ќе ги охрабри малите домашни акционери на таа банка, а многу е веројатно да се очекува дека ќе охрабри многумина инвеститори на берзата да купат од таа акција.
Само за потсетување оваа банка на 20 јуни ќе подели нето дивиденда од 107 денари за акција за секој имател на обични акции на таа банка.
Како банката оствари добивка од една милијарда денари за 90 дена?
Нето приходите од камати достигнаа 960 милиони денари и во однос на првиот квартал лани се поголеми за 47 милиони денари. Во исто време нето приходите од надоместоци и провизии достигнале 245,3 милиони денари и во однос на првиот квартал лани се поголеми за речиси 9 милиони денари. Клучната предност за овој фантастичен резулат е во резервациите на средства за кредити. Имено, банката за првите три месеци има ослободени резервации во износ од 199 милиони денари. За споредба во истиот период лани имала резервирани средства во износ од 133,7 милиони денари. Ова значи дека „Фени Индустри“ во голема мерка ја стимулирал кварталната добивка на „Стопанска банка“ затоа што со неговото проработување почнал да сервисира обврски и банката ги намалила своите резервации.
Трошокот на банката кој настанал како загуба заради оштетување нефинансиски средства е минимален и изнесува 7,7 милиони денари.
Кредитирањето го држи на исто ниво, депозитите пораснале за 1,1 милијарди денари
Кредитирањето за првите три месеци е на ниво од 60,8 милијарди денари што е речиси исто како и лани кога кредитирањето во првиот квартал било 60,66 милијарди денари. Од другите ставки на билансот на состојба значајно е да се истакне дека депозитите на други коминтенти пораснале за 1,1 милијарди и достигнале 71,97 милијарди денари.
Р.Ф.