Купувајте злато, ќе продолжи да поскапува

Добивај вести на Viber

Златото најверојатно ќе поскапи над 2000 долари за унца следната година, бидејќи централните банки ќе продолжат со своите програми за инфузија на ликвидност, коментира Рејмонд Кеј, директор за трговија со метали на Дојче Банк, пренесува Блумберг. „Ќе ја  поминеме границата од 2000 долари и веројатно ќе отидеме дури уште подалеку", вели Кеј, кој додава „Ова ќе се случи ако централните банки продолжат да печатат пари." Златото најверојатно, 12-та година по ред ќе бележи поскапување поради стравувањата дека ликвидните програми на владите и централните банки ќе ја намалат вредноста на валутите и ќе доведат до инфлација. Златото што поскапе и до рекордни 1921,15 долари за унца на 6 септември 2011 година, во моментов се тргува за околу 1728 долари за унца. На 5 ноември златото на берзите поевтини до 1672,75 долари за унца, што е најмногу последните 9 месеци,  откако беа објавени добрите податоци за вработеноста во САД кои го зајакнаа доларот. Бразил, Јужна Кореја и Русија се меѓу земјите кои од почетокот на годината ги проширија златните резерви, покажуваат податоците на Меѓународниот монетарен фонд (ММФ). „Додека централните банки во светот купуваат злато, а макроекономската ситуација останува несигурна, побарувачката на злато ќе остане доста голема“, вели Џејми Сокалски, извршен директор на „Toronto Barrick Gold Corp.“