Курти: Во Косово малцинствата сочинуваат околу осум отсто, во Србија околу 20 отсто

Добивај вести на Viber

Наместо Вучиќ да жали што му бил министер на Милошевиќ, тој жали што излегов од затвор, вели косовскиот премиер Албин Курти. Тој се лути затоа што Србија не сака да го признае Косово и го смета за вештачка држава. 

Курти изјави дека е подготвен да разговара за обединувањето на српските општини и правата на Србите на Косово, како дел од дискусијата за нормализација на односите меѓу Белград и Приштина врз основа на предлозите на Германија и Франција.

Во интервју за германскиот весник „Франкфуртер алгемајне цајтунг“, Курти рече дека во изминативе десет години во Брисел се склучени 33 договори, од кои две третини не се имплементирани во Србија.

„Србија сака да го издвои тој еден договор и да ги игнорира преостанатите 32, како и германско-францускиот план. Нема да учествувам во тоа“, рече Курти.

Тој наведува дека Србија во „вештачката држава“ сака заедница на српски општини. 

„Српското решение е „не постоите, но ние сакаме нешто од вас“. Тој нема да може да го направи тоа. Покрај тоа, кога молите за нешто, секогаш треба да имате на ум дека истата молба може да биде упатена и до вас. Во Косово, малцинствата сочинуваат околу осум отсто од населението, во Србија околу 20 отсто. Србија треба да се грижи за принципот. Дополнително, и нашиот Уставен суд рече дека ЗСО не е во согласност со Уставот на Косово“, рече Курти.

За високиот претставник Жозеп Борел дека на неодамнешните разговори во Брисел тврдоглаво се противел на компромисот, Курти рече дека „не е тврдоглав, туку верен на принципите“.