Лани природните непогоди чинеа 366 милијарди долари, а годинава?

366 милијарди долари минатата година го чинеа светот природните непогоди ,изјави еврокомесарот за меѓународна соработка, хуманитарна помош и дејствување во кризни ситуации, Кристалина Георгиева ,во Европскиот парламент.Според Георгиева бројот на несреќите постојано се зголемува и оти тие стануваат се поинтензивни, при што штетите од 2005 година досега се зголемиле за 123 милијарди долари.

- Климатските промени, растот на населението, развојот на економијата во комбинација со зголемување на бројот и интензитетот на природните непогоди водат кон се поголеми штети за луѓето и за стопанството, додаде таа.

Георгиева се повика на извештај изготвен од 220 научници од 60 земји, во кој се наведува дека во иднина се почесто светот ќе страда од горештини, суши, поплави и бури. „Нашиот свет се менува и ние сме се поранливи“, истакна таа и додаде дека тоа е причината поради која Европа има потреба од зајакнување на системите за заедничка цивилна заштита. „Се почесто се појавуваат несреќи, на кои една држава не е во состојба да одговори сама, поради што ни се потребни заеднички инструменти за спасување на животите и спречување на штетите“, рече Георгиева. Инаку, годинава една од најсилните непогоди што го погоди светот беше ураганот Сенди кој предизвика повеќе штета отколку Ајрин минатата година, но точните пресметки ќе одземат повеќе време поради големите материјални штети, коментираат осигурителните компании. Засега проекциите за штетите се различни и се движат од 5 до 20 милијарди долари, но стравувања се дека оваа бројка може да стаса до повеќе десетици милијарди долари. Само загубите на осигурителните компании се очекува да стигнат до 10 милијарди долари.