Лас Вегас во Македонија: Раст на бројот на автомати и обложувалници
Објавено во: Економија 24 Јули, 2019
Државата наплатила за една година 53,4 милиони евра од сите давачки кои се однесуваат за приредување игри на среќа. Во извештајот на Државниот завод за ревизија кој се однесува на буџетот на државата стои дека ова се 1,94 отсто од буџетот, а дека наплатата на овие давачки има нагорен тренд. Во оваа сума влегуваат посебните двачки од игри на среќа, даноците на доход од добивките, месечните паушали и надоместокот за лиценци. Сепак она што е значајно е што има значаен раст на бројот на отворени автомат клубови и обложувалници во последните три години.
Така ако во 2018 година во земјава имало 230 автомат клубови, што е за 39 повеќе од годината претходно. Или во 2017 година имало 191 вакви клубови. Во 2016 година пак нивниот број изнесува 131.
Ако се анализираат обложувалниците, во 2018 година нив ги има вкупно 750, што е за 107 повеќе отколку што биле во 2017 година кога функционирале 643 обложувалници. Бројот е зголемен за 16 проценти. Во 2016 година пак во земјава имало 535 обложувалници.
Бројот на казина стагнира, односно ако во 2016 година биле 6, во 2017 и во 2018 година работеле пет казина.
Во извештајот стои дека Управатa за јавни приходи е надлежна да ги контролира овие субјекти, а во 2018 година направени се вкупно 970 надворешни контроли.
Инаку и ревозирите забележуваат што граѓаните често играат игри на среќа на интернет, а поради тоа што странските субјекти не се регистрирани во зeмјава никој не води контрола за тоа колку пари на ваков начин заработуваат. За тоа не се плаќа ни данок, а ревизија смета дека на ваков начин се создава нелојална конкуренција, па бараат Министерството за финансии и Агенцијата за електронски комуникации да иницираат активности за законско регулирање на странските интернет страни.
A.T.